حيث نشرت الصحفية ومعدة البرامج “نوران نصار” على صفحتها على الفيس بوك صورا تجمعها بالفنان العالمى الراحل “عمر الشريف”، وكتبت نوران نصار جوانب من حياته واسرار تكشف مدى طيبته وأخلاقه العالية، حيث قالت نوران : بعد ماقريت الخبر قلبت في صوري مع العظيم الراحل عمر الشريف وأفتكرت كلامه معايا خلال برنامج التجربه و برنامج الجريئه وخلال حواراتي الصحفيه معاه أثناء تصويره فيلم حسن ومرقص.
كما اضافت مش ممكن أنسی لقائي معاه علی مدار أسبوع علی العشاء يومياً وكلامه الشيق المعطر بذكريات الماضي الجميل و حديثه بحب وأحترام وتقدير عن السيده فاتن حمامه رحمها الله، مش ممكن أنسی أن عمر الشريف رقص معايا slow تاني يوم تصوير، مش ممكن أنسی أنه عرف من أستاذه أيناس بكر القائمه بأعماله أني بحب الأيس كريم وأصر أخر يوم قبل ما أسافر أنه يعزمني علی أكبر كاس أيس كريم شفته في حياتي وطلب منهم في المطعم يعمله مخصوص.
مش ممكن أنسی وأنا بحاوره في الفلوكه وفجأه جت سيرة الراحله هند رستم فقالي :هي ماتت قلتله :أيوا ، قالي: يعني كلهم بيموتوا كدا وسايبني لوحدي نفسي أموت وأروحلهم بقی ، دا غير كلامه عن الشيخ الشعراوي ومدی حبه وتقديره لهذا الرجل رحمه الله ، مش ممكن أنسی كلامه عن د.مجدي يعقوب وعن تقديره لدوره الأنساني وال بالصدفه وهو بيتكلم عن تكتشف أن عمر الشريف بيساهم بدور أنساني كبير في جمع التبرعات ودعم مستشفی مجدي يعقوب للقلب وغيرها من المشاريع الخيريه فينكشف لك وجه أجمل من وجه ال (جان) وجه طيب محب للخير ماشي بمبدأ أصرف مافي الجيب يأتيك مافي الغيب..مش بيعرف يخوش بيعرف يسعد نفسه ويسعد ال حواليه.
وفي أول يوم لينا في أسوان قرر يعزمنا ويعزم د. مجدي يعقوب و الفريق الطبي المرافق لي كله بزوجاتهم تقديرا وأمتنان منه لدورهم الأنساني..بقی يقولي دول ناس سايبين حياتهم وجايين ينقذوا حياة أطفال، مش ممكن أنسی كلامه عن أسوان وتغزله في كل مكان فيها بحب وغرام، مش ممكن أنسی في حوار صحفي أجريته معاه بعد كدا في سميراميس الساعه 10 صباحاً وأصراره أنه يختارلي الفطار بنفسه وقد أيه كان بسيط ومتواضع والأبتسامه لا تفارق وجهه مع كل العاملين في الفندق وكل عشاقه ال بيطلبه يتصوروا معاه بأولادهم.
مش ممكن أنسی كلامه وأعجابه بالراحل أحمد زكي ال كان شايفه أهم وأفضل من نجوم هوليود وأن لولا عائق اللغه لكان أحمد زكي نجم عالمي مكسر الدنيا.. من الأخر مش ممكن أنسی عمر الشريف لأنه كان حلم من أحلامي وأتحقق لما شفته..وحاورته وأستضافته في برامجي..مش ممكن ننسی نجم شرفنا ورفع راسنا ومصدر فخر لينا كمصريين..مش ممكن ننسی صراع في الميناء ..سيدة القصر..نهر الحب..أشاعة حب.. بيتنا رجل.. الأراجوز..المواطن مصري..و أيامنا الحلوه..
مش ممكن ننسی لورانس العرب عمر الشريف.. الله يرحمه ويغفرله ويسكنه فسيح جناته.
